الأربعاء، 28 مايو 2008

تابع يوم الخميس العظيم

ازيكو


بما ان بكره يوم الخميس

فقلت الحق احكلكو اللي حصل ف الخميس اللي فات

عشان منساش لان بكره انسو اني اكون موجوده اصلا


المهم

أغلب الناس مش مصدقين ان العيله لسه ليها باقي


والله لسه الفرع اللي ف القاهره كله

وهم عمي وزوجته العزيزه طبعا

أبله هناء وجوزها الله يخليه(أصله مبيجيش غير قليل) وولادها التلاته وبلاش نقول اساميهم اصلهم بيجو ع السيره

شرين وجوزها الله يخليه هو كمان( للعلم جوزها يبقي اخو جوز ابله هناء) وبنتينها ولله الحمد هي زودت العيله فرد كمان من يومين

ربنا يستر

وشيماء

من غير جوزها (وبما ان فرحها قريب(يالهوييييييييييييييييييييييييي) حيبقي في جوزها)

واشرف وزوجته اللي هي تبقي بنت عمي اصلا قلتلكو انا الموضوع ده ومعاهم روفيدا ومحمد

دول اللي ف القاهره

يوووووووووووووووووووووووووه

نسيتوني

لسه مرات عمي (عايش ) من هنا فالبلد وولادها التلاته

بس الحق يتقال الست مش بتيجي غير ف المناسبات السعيده

يعني

انا تعبانه

ماما مش قادره تتحرك

بابا راح لاربع دكاتره

وطبعا النجاح والافراح برده

كده يبقي العيله فول اوبشنوتقريبا مش ناسيه حد ( لو افتكرت حقولكو)


نبدا ف الاحداث

اصحو كده وفنجلو عنيكو وطقطقاو ودانكو ماشي

طهقانه ومفروسه انتو اهم اتنين لازم تركزو عشان تقولو رايكو


طبعا اول مكل دول بيجو ممنوع

ممنوع منعا باااااااااااااااااااااتا اني المس الكمبيوتر

وياسلام بقي

ياسلام ماما تلمحني كده معديه جنب اوطي

ازاي وازاي العيله كلهم هنا وانا سيباهم يقولو ايه معرفتش تربيني

ماعلينا بلاش الكمبيوتر هي يعني مصر حتقف

تعالي علي نفسك يابت

انا وعزه واخدين ركن ومش بننطق ولو اتكلمت يبقي لازم حعك عشان حقول راي وهو بصراحه مبيعجبش غير سوسو الله يكرمها ( عمتو)

طيب انا بعمل ايه.......................؟

عزه وانجي بيتكلمو ف المكياج وانا مبفهمش فيه

بابا وباقي العيله بيتكلمو ف حوار غالبا ببقي عاوزه اقول راي بس بتكتم عشان متقلبش بخناقه بيني وبين زيزي عمتو

قوم احط ف بوقي جزمه واتكتم احسن صح

وياتي الوقت الموعود

العشاااااااااااااااااااااااااااااااااااااااء

ومين بقي المزغوده ف قلبها اللي مورهاش حاجه هوبه حبيبة الجماهير

ماما الله يكرم اصلها ويباركلها بتحضر الاكل

بس المشكله ف اللي هي بتنسي تجيبه

وهو كالتالي

عمتو سوسو تبدا

هبه هاتي لمونه

هبه هاتي قزازة مايه(ولازم تكون مقفوله )ليه معرفش مانا كده كده جايبه كبايه

هبه الملح

هبه في عيش ف التلاجه سخنيه

هبه الخيار خلص قطعي وهاتي

وميمنعش طبعا ان الوليمه يكون فيها فول وطعميه ومولوخيه عمتو بتموت فيها ياعمتو مولوخيه الساعه 12 حرام

اسكت يا بت انت بتفهمي حاجه

تسكت النزغوده( انا يعني)

خلصو الاكل لـــــــــــــــــــــــــــولي

الشـــــــــــــــــــــــاي ودي اكتر مرحله بكرها

عمتو هبه الشاي معلقه ونص سكر ونص معله شاي ومتقلبهوش ( ليه معرفش)

عمتو زيزي اغسلي اديكي يا هبه ( وانا اصلا غسلاها والله)

ابله امول لالالالالالالالالالالالالالالالالالالالا مبحبش الشاي( احسن برده ف سري)لكن من بره ليه كده ياامول دانا عليا كبايه شاي تحفه

المهم يرسي الحوار علي 7 كبايات شاي موكن من ايد الهانم اللي هو انا

وبعدها نبدا رحله الزنوب

عمتو سوس تنجعص وتاخد الوضع لبدايه رحله سيرة الناس

بصراحه زيزي عاقله تقول حرااااااااااااااام

لكن مين عديكو لو واحده ولا واحد مضايقها ولا فاقع مررتها وهما كتير للاسف تبقي امه داعيه عليه ف ليله قدر( ومش حرام ولا حاجه صح)

للعلم

الاطفال موجودين ف اوطي قاعدين ع الكمبيوتر بتاااااااااعي وكل شويه هبه لودي مش راضي يخليني العب

هبه امير بيجيب العاب من ع النت وانا عاوز العب طرزان

وتستمر المسيره وكان حل مشكله الشرق الاوسط انهم يقولو كلمه واحده


هبه


ينتهي اليوم الساعه الثانيه صباحا

والله بيبقي يوم حلو بس بخرج منه كاره كلمه واحده بس تعتقدو ايه هي



هبه
مع تحياتي
لاحلي عيله ف الدنيا
والله بحبكو

الاثنين، 26 مايو 2008

ومضي يوم الخميس العظيم

ازيكو
طبعا انا مقصدش يوم الخميس اللي فات
ولا يوم الخميس اللي جاي
لالالالالالالالالالالالالالالالالالالالالالالالالالا
انا قصدي كل يوم خميس ف بيتنا
بصو
يوم الخميس ده اليوم اللي العيله بتتجمع فيه عندنا
هو بيبقي يوم حلو
بس انا ححكيلكو اللي بيحصلي واحكمو
يرضي ربنا ولالا
نبدا
يبدا اليوم
من الساعه 7 ويبدا الضيوف ف القدوم
عمتو ( سوسو) مسمهاش كده
واسرتها اللي هما
ابنها ومراته
و ابنها ومراته
وابنها لوحده عشان مش متجوز
وابنها التاني ومش متجوز ده تبع الاطفال
وبنتها اللي هي
عزه وجوزها ( ودي حبيبتي)
عمتو ( زي زي)
وابنها
وابنها ( لودي وده قصه لوحده)
ولاد عمتي الله يرحهما
( امول)
وابنها
وبنتها
( نهنوه)
وابنها
وابنها
وساعات جوزها
مرات عمي الله يرحمه
وابنها
وابنها
مرات عمي الله يرحمه برده
وبنتها
وبنتها وولاد بنتها روفيدا ومحمد
وبنتها التانيه دي
تبقي اصلا مرات ابن عمي اللي عايش ف القاهره
اصحو انتو نمتو
ساعات بقي
اللي ف القاهره بيجو
وتقريبا عددهم قد اللي فاتو
حد صاحي
يوووووووووووووه
كل ده ف العيله بس
انا نسيت اوصف
كفايه كده عشان تعبت
بكره حوصفلكو
سلام

الخميس، 22 مايو 2008

مواطن بلوجي جديد


ازيكو زواري الاحباء


مش عارفه اقولكو ايه

مزهوله ممكن


مبسوطه يجوز


عندي .........

مش عارفه

المهم

ابطل رغي وادخل ف الموضوع

النهارده انا شرفت الاخت مفروسه بالزياره طبعا

وهي ماشاء الله مدونتها عجباااااااااااااااااااااني جدا

اللي عملي حاله الزهول اللي انا فيها

هي علاقة البلوجين ببعض

يعني مثلا

مدام مفروسه

قعدت تعد صحابها اللي انا معرفش فيهم ناس كتير

وحفظاهم زي ميكونو اخواتها

انا مش بحسدهم لاسمح الله انا بنق بس

خيخه

رئيس جمهورية نفسه اللي هو اخو حد من البلوجين بس مين مش عارفه

طهقانه

والخ

انا حتي مش فاكراهم

انا يدوب

عارفه

سونسه

وساره

وشريف

وتامر

والله نسيت الباقي


وطبعا منساش الست اللي عملالي قلبنان ف دماغي

خالتي فرنسا

انا من كتر مانتو بتكتبو عنها

حد يكسب فيا ثواب ويقولي هي مين

كل الناس بتطالب بعودتها

واخيرا هي رجعت

طب عرفو منين انها رجعت


مش عــــــــــــــــارفه

بس بما انهم طالبو بعودتها اكيد هي تستاهل


يووووووووه

انا اتلغبط

المهم انا عجبني اوي احساس انكو عيله واحده و عارفين بعض


انا مبسوطه جدا اني انضميت ليكو

اي نعم انا انضميت مش بمزاجكو

بس اهوه انضميت وخلاص

امركو لله......................

امضاء


مواطن بلوجي جديد
ملحوظه :
انا نسيت طبعا سهوا اضيف
white heart
من الناس المهمه اللي بزورهم
ناسف علي السهو

الاثنين، 19 مايو 2008

لقاء.....


حبيبتي

إرتاح قلبي بالقاء

حبيبتي

وارتاح أكثر بالبقاء

والتقاينا والتقي بنا حبنا

بعد خوف أن يضيع هوا هباء

أخبريني أسمعيني طمئنيني

هل يظل الحب صبحا ومساء

قالت الدنيا بطرف لسانها

إنني أنت وأنت أنا سواء

كيف يبقي واحد من غيره

هل تعيش الأرض من غير السماء

إطمئن القلب حين سمعتك

أمرت عيوني الدمع فنساب البكاء

فرحا علي ما رأه في وجهك

إشراقة الشمس المضيئة ف السماء

أنت الهدي مرآة حالي وزوجتي

أنت الدواء الشافي

لي ولكل داءبقلم



بقلم والدي العزيز


للعلم دي مكتوبه لماما

انا بحقد عليها اصلا عشان الكلام ده مكتوبلها مع مراعاة انها الوالده العزيزه برده

يوم متندم


يوم ماتندم اوعي ترجع

حتلاقيني بقلب تاني

بعد زرعك شوك بيطلع

وان لمسته انت اللي جاني

لو ندمت ف يوم وجيتني

قلبي لابيض حتلاقيه

فاتو لونه مع اللي فاتني

والسواد اصبح ماليه

بعد املي وفرحي بيك

شوفت غدر الدنيا فيك

مش بايدي كرهت نفسي

والامل بقي هو يأسي

واللي يزرع شوك بيجمع

وانت يوم حتكون مكاني

يوم ماتندم اوعي ترجع

حتلاقيني بقلب تاني

نبض قلبي كان زمان

فيه اماني وفيه حنان

والنهارده خلاص يا عمري

قصدي يا عمري اللي كان

النهارده بعيش سنين

فيها صبار الأنين

والليالي تطول عليا

والدموع تجري ف عنيا

والقي صرخه ف قلبي تسمع

صرخه مكتومه ف لساني

يوم متندم اوعي ترجع

حتلقيني بقلب تاني

للعلم

القصيده بقلم

عمتو

اللي هي اخت بابا


الأحد، 18 مايو 2008

كلام واحده فاضيه


ازيكو

النهارده قررت ادي لينك المدونه لشخصيه اعرفها

عشان اعرف رايها ف اللي مكتوب

الغريب ان رايها صدمني فعلا



ايه يا هبه ده ده كلام واحده فاضيه مورهاش حاجه



مش حنكر واقول الكلام ماثرش فيا

لا انا زعلت وزعلت اوي كمان

يمكن يكون كلام واحده فاضيه

بس كلام كتبته وانا حاساه

فاضي بقي ولا لا

عبر عني ف وقت وخلاص

معرفش انا بكتب الموضوع ده ليه مع انه مش حلو ف حقي

بس انا عملت المدونه اصلا

عشان لما اعوز اكتب اكتب هنا وانتو تردو عليا

حتي لو كان اي موضوع

انا الموضوع ده مضايقني

الشخصيه دي شافت انه نقد وده من حقها

لكن انا كتير غيرها دخلو المدونه وعجبتهم حتي لو كانو بيجاملوني

فكرتي تحترم

صح



عاااااااااااااااااادي

ولا يهمني

حكمل كتابة الكلام الفاضي بتاعي

عادي


ولو معجبكمش ياريت تقولو ومتجملونيش

للعلم

الصوره اللي فوق مش عشان تمشي

مع الموضوع لا الشخصيه هي اللي بعتهالي

عيد ميلاد الجميل


يوم ميلاد أغلي الحبايب

يوم ميلاد حبي الجميل

أهدي عمري وحبي ليكي

ف يوم ميلادك لا بديل

يا حبيبت قلب بابا

الميلاد دا يبقي كام

لو كبرتي عندك انت

اما عندي بنت عام

إنتي اللي ف عيوني بتحبي

إنتي اللي علي كتفي بتبكي

إنتي اللي بضمك ف حضني

لو ف يوم محتاج انام

ياحبيبت قلب بابا الميلاد دا يبقي كام

هوب ( اللي هو انا يعني) حبيبت قلب بابا

اكبري عام بعد عام

مش بسنك لا بعلمك نجري نوصل للأمام

نفسي أشوفك نور لعيني

لو صادفت يوم ظلام

نفسي أشوفك يوم لساني

لو عجزت عن الكلام

نفسي تبقي بلسمي

لو صدفت ف يوم ألالام

نحتفل بميلاد ولادك

يومها عمري يبقي كام
بقلم والدي العزيز
للعلم دي كانت بمناسبة عيد ميلادي

الشبل والاسد

طبعا انا صدعتكو بكتاباتي الخطيره
دلوقتي بقي
بجد
بكل فخر
حقدملكو قصايد
والدي العزيز
عشان تعرفو بجد
إن هذا الشبل من ذاك الاسد

الجمعة، 16 مايو 2008

نزولا علي رغبه الجماهير

نزولا علي رغبة الجماهير
اللي زعلو جدا ان المدونه بلا زوار
فقد قررنا نشر المدونه بينكم
لعل وعسي يعجبكم ما اتي فيها



وشكرا لكل اللي دخل وقال رايه
ودي حاجه تشرفني دايما انكو تدخلو وتقولو رايكم



وللاسف
ستصبح
مدونه بلا بلا زوار

الخميس، 15 مايو 2008

وهلت المصايب مع اول زائر


طبعا انا قلتلكم قبل كده ان محدش يعرف اني عندي مدونه اصلا ولو نسيتو انزلو لتحت واقرؤ المهم

انا اتهورت النهارده واديت اللينك لاخت انتيمتي وطبعا انا كده اخترت الشخصيه الصح جداققرو تحت وانتو حتعرفو ليه

ولحسن حظي

الفظيع

انتيمتي كانت جنبها وبتقرا

وعلي غير توقعاتي الخطيره واللي دايما بتطلع صح طبعا

المدونه عجبتها

الي ان حدثت الطاااااااااااامه الكبري




قرت اللي انا كتباه عنها

معرفش زعلت ولا لا بس مخدش الموضوع معاها كتير

وبكده يبقي مع قدوم اول زائر للمدونه

هلت المصائب

السؤال ؟؟؟؟؟؟

المدونه لو انتشرت زياده

كام مشكله حتحصل

وبعد كده اتسحب من لساني واكتب اللي نفسي فيه

ولا اتكتم احسن

ماهو انا لو كنت سكت وبطلت اكتب اللي ف نفسي مكنش حصل اللي حصل

اقولكم

حكتب اللي ف نفسي

وزي متيجي تيجي

وانا واثقه ان مفيش مصايب تاني




حزرو فزرو ليه


عشان مش حيبقي في زوار تاني

انقطع الزوار علي يد اول زائر


وربنا يستر

انا عارفه لساني

مع تحيات


مدونه بلا زوار
من غير تريقه الصوره اللي فوق
i miss you
للزوار

الأربعاء، 14 مايو 2008

إنك حبيبي مش هنا


جوه مني ذكريات تاهت خلاص جوه الأسي

مرة تفرح مره تحزن مره تيجي بالبكي

وانت منها جوه مني بس مش تايه حبيبي

انت عندي جوه قلبي انت عمري والهوي

ده مكانك وبرضايه بعد كل اللي انت عارفه وانتهي



أيوة عارف إن ايامي معاك ضاعت هدر

وبعدها سيبتك مكانك عايش معايا

كأننا ف يوك اللقي

لكن النهارده اخرج بقي واقعد هنا


أن الاوان تسمع الامي تحضن الامي تمحي الاسي

آه ه ه ....... اللي عندي كتير اوي

حمل عمري مكنت أفكر إنه يوم يجي لبشر

بس جاني

والمشكله انك حبيبي مش هنا

دي غلطتك

فهمتني انك معايا

علمتني انك كفايه

طيب

اهو الحمل عندك حله بقي

أصله ابسط من خيالك

حله اصغر من حدودك

إنك تجيني من مكانك تاخد حياتي جوه حضنك من غير كلام او بكي



الغريب ف الحل ده

انك حبيبي مش هنا

يبقي قوم ارجع مكانك كمل حياتك جوا ميني

وانا راح اكمل حل المشكله

والمشكله

ان الحمل زاد كده مشكله

انك حبيبي مش هنا




دي الجزئ التاني من مش حرجعلك

وبما ان مش حرجعلك طبعا عجبتكو

قلت اوريكو الجزئ التاني

للعلم

25/6/2006

مش هرجعلك


كنت بحلم يوم بفارس قلبه جاي من زمان

يفهم النظره الحزينه يمسح الدمع اللي كان

وقلت جاي

لكن

شوفت كتير وكتير ياحياتي جوه حياتي

ناس كدابه ناس غشاشه ناس ليها الف معني ولون

لحد ماشفت الصوره كبيره وحشه وسوده مافيهاش لون

وف يوم وليله لقيت حاجات مالهاش معاني جوه قلبي

قلت اسال ؟؟

قالي فوقي الحلم جاي!!!!!

بصيت قصادي لقيتك انت

مديدلي ايد بتقول تعالي

حضني فاضي مستني قلبك

يمسح الحزن اللي فيه ويرجع البسمه البعيده


حسيت يوميها اني اتولت من جديد

وعمري اللي شاخ قبل الاوان رجع رضيع

واتولد بدل السكون مليون امل

عارف ده كله كان سببه ايه


كان سببه حبك اللي دخلني

من ماحتي يدق باب

ورضيت بحبك رغم كل الالم



ايوه ياعمري

كان ف طريقي بسببك شوك

جرح فيا وكنت بموت

لكن ارجع اشوف ف عيونك ضي جميل

اعرف اني هاعيش

اقوي واقوم وادوس من تاني


يمكن الاقي بعد الشوك

ليدي ف ايدك ودا عنواني



كنت بتسال عني بقول اني سعيده

لا ياحبيبي ده كان م الخوف

كنت بخاف لبسببي تنام وانت ف قلبك دمعه حزينه

واقول ف الاخر انا اتحمل


بعد ده كله تيجي تقولي خلاص يا حياتي

انا راح امشي بكل سلام


عارف معني غيابك ايه ؟؟

انك تاخد قلبي وعقلي وحب كبير


وتسيب لي

قلب حزين عقل شريد وعمر خلاص مبقاش فيف




دا انت مشيت من غير حتي متقول ليه

طاب كان ليه

تشغل قلبي وبعد محبك تجني عليه



انت ياعمري كنت ضعيف

ونسيت قلبي ف حضن الناس

بس يا عمري بعد ده كله

انا بتمني تلقي الحب ف يوم من تاني

لكن يوم متحس بتوهه وتقول ترجع




اعرف اني حدوس علي قلبي

ومش حرجعلك

مش حرجعلك

ايوه يا عمري

مش حرجعلك



للعلم
20/6/2006
ومستوحاه من قصه حصلت لحد اعرفه
ومتسرحوش بخايالكو وتعتقدو انه انا
مش انا
مش انا
تصدقو تصدقو
متصدقوش انتو احرار

كنت تجلس هنا يوما


اصبحت اشعر بك في كل شئ حولي

اشم عبيرك في كل مكان اشعر انني اصبحت ريشة صغيره تتنقلها نسمات حبك الساحر

هوهنا اغمض عيني واترك للحلم العنان ليحملني حيث يشأ ما اجمل هذه اللحظات

حين انظر حولي اجدك في كل شئ هنا وهناك ....................


لا يوجد معك ما يدعي فراغ بل معك غارت الجنه

وطلبت ان تاتي إليك لتري ما انا فيه

لا اعرف ما اشعر به حين اتنسم رائحتك

شعور لا يوصف باي كلمات خلقت للبشر

فمعك مر زمن الكلمات وجاء زمن الصمت ففي عينيك كل ما خلق منها

لو راك العاشقين لعرفو انهم لم يقولو شيئا وانهم لا يملكو ما يقال بعد عينيك

فكيف اصف انا ما اشعر

وهكذا اظل ارتفع بحلمي معك الي الافق الي اعلي واعلي

وحين انظر الي عينيك

ارفض ان اسالك ما كنت اريد ان اعرف حتي اظل بهذا الحلم ولا استيقظ

وبكل هذه المشاعرالتي لا تنتهي والحب الذي احمله بجنباتي الملم نفسي من حولك لاسالك هل........؟

وفجاه تنظر الي وتبتسم ثم تترك يدي

لاعرف ان سؤالي لن يكون له اجابه فما كان يجب ان اساله

لا لا لا لا

لقد استيقظت

فانت لم تكن معي ولن تكون معي

لقد جاء ت اسواء نهايه لاجمل حلم

والواقع الذي صنع حلمي

اني اجلس حيث رائحتك حولي

وصورتك امامي

نعم

الحقيقه الوحيده في هذا الحلم







انك






كنت تجلس هنا يوما
للعلم دي كانت يوم
1/4 2003

مفيش حد

ازيكو
اللي هما مين مش عارفه
اصلي اكتشفت امبارح ان المدونه بتاعتي
محدش يعرف عنها حاجه اصلا يعني انا عاملاها لنفسي
وكمان محطتش فيها حاجه تذكر عشان حد يقراها
انا حتي مديتهاش لانتيمتي لانها كالعاده مش حتهتم انها تفتحها ولو فتحتها مش حتعجبها يعني حضايق وعلي ايه
يبقي الحال علي مهو عليه لحد ملاقي حد اديلو عنوانها يمكن يعبرني ويدخل
المهم
انا قررت اكتب كتاباتي الخطيره الفظيعه اللي مالهاش حل
فيهم اللي مكتوب وانا اعدادي ولما قريته قعت اضحك لانه بصراحه كلام فظيع ملوش اي علاقه ببعضه
حكتبه وكل صحابي لما يقروه يضحكو بمزاج او يهزقوني بمزاج او يريحو نفسهم يقفلو المدونه وميفتحوهاش تاااااااااااااني